महारुद्र थानलाई धार्मिक पर्यटकीय गन्तव्य बनाइने

पर्यटन बजार२७ फाल्गुन २०७७, बिहीबार मा प्रकाशित

महारुद्र थानलाई धार्मिक पर्यटकीय गन्तव्य बनाइने

फागुन २७ , गण्डकी । पोखरा महानगरपालिका–३३ बरपाण्डेथुमस्थित ३२५ वर्ष पुरानो महारुद्र थानलाई धार्मिक पर्यटकीय गन्तव्य बनाइने भएको छ । धवलागिरि, अन्नपूर्ण, माछापुच्छे«, लम्जुङलगायत हिमालका साथै पोखरा र लेखनाथका रमणीयतालसहित अन्य भूभाग एकसाथ अवलोकन गर्न सकिने यस ठाउँको प्रवद्र्धन र विकासका लागि पहल थालिएको हो ।

धार्मिक पर्यटकीयस्थलका रूपमा विकास गर्दै यसलाई पर्यटकीय नगरी पोखराको अर्को महत्वपूर्ण गन्तव्यका रूपमा विकास गर्न ऋषेश्वर भुवाइ (ऋतु)को अध्यक्षतामा महारुद्र पर्यटन प्रवद्र्धन समिति गठन गरिएको छ । समितिको उपाध्यक्षमा राधिका आचार्य, सचिवमा मनु कार्की, सहसचिवमा दीपेन्द्र आचार्य र कोषध्यक्षमा केशवराज आचार्य रहेको छ ।

समितिको सदस्यमा भोजराज शर्मा पौडेल, जगतराज आचार्य, गोविन्दराज लम्साल, गोपाल गुरुङ, कृष्णप्रसाद आचार्य, मीना भण्डारी आचार्य र लीला नेपाली रहेको छ । समितिले समाजका २५ उच्च प्रतिष्ठित व्यक्तिलाई सल्लाहकारका रूपमा चयन गरेको छ । महारुद्र थानको विशिष्ट ऐतिहासिक महत्व रहेको बताउँदै अध्यक्ष भुवाइले विभिन्न अध्ययन तथा अनुसन्धानबाट ३२५ वर्षअघि जुम्लाबाट आएका एक व्यक्तिले महारुद्रको शिलालाई झोलामा बोकेर ल्याई यहाँ स्थापना गरेको पाइएको जानकारी दिए ।

बरपाण्डेथुम र आसपासका सर्वसाधारणले आराध्यदेवका रूपमा परापूर्वकालदेखि पूजाआजा गर्दै आइएको महारुद्र थानमा आगामी दिनमा शिव महापुराण लगाउँदै विशाल महारुद्रको मूर्तिसहितका संरचना निर्माण गर्ने दीर्घकालीन लक्ष्य लिइएको उनले बताए ।

लामो समयसम्म सामान्यरूपमा शिला पूजा गर्दै आइएकामा विसं २०२५ मा सानो ढुङ्गाले छाएको मन्दिर स्थापना गरिएको र विसं २०५४ मा हालको मन्दिर निर्माण गरिएको जनाइएको छ । पर्यटकीय विकासलाई लक्ष्य गरी गुरुयोजना तयार गर्न लागिएको र मन्दिरलाई शिव पाञ्चायन मन्दिरका रूपमा प्यागोडा शैलीमा निर्माण गर्ने, भ्यूटावर बनाउनेलगायत सोच रहेको समितिले जनाएको छ ।

Facebook Comment

छुटाउनुभयो कि?