विश्वभर ६३ वटा मुलुकले अहिले भ्रमणमा लगाइरहेका छन् रोक

पर्यटन बजार२० असार २०७८, आईतवार मा प्रकाशित

विश्वभर ६३ वटा मुलुकले अहिले भ्रमणमा लगाइरहेका छन् रोक

असार २०, काठमाण्डौ। विश्वभर २९ प्रतिशत पर्यटकीय क्षेत्र अझै पनि पूर्ण रुपमा बन्द रहेको पाइएको छ । संयुक्त राष्ट्रसंघीय विश्व पर्यटन संगठनले आइतबार सार्वजनिक गरेको प्रतिवेदनअनुसार विश्वभर ६३ वटा मुलुकले अहिले भ्रमणमा आउने पर्यटकका लागि सबै नाका बन्द गरेका छन् ।

कोरोना भाइरसको महामारीका कारण पछिल्लो डेढ वर्षयता यस्तो प्रतिवन्ध शुरु भएको हो । कुनै बेला शतप्रतिशत बन्द रहेको विश्व पर्यटन अब क्रमशः सुरु हुने क्रममा छ ।

संगठनले यात्रा प्रतिवन्ध सरल बनाउने उपाय वृहत खोप अभियान भएको भन्दै सो कामलाई प्राथमिकतामा राख्न समेत संगठनले सरकारहरुलाई ध्यानाकर्षण गराएको छ ।

अर्थतन्त्र चलायमान बनाउन पर्यटकीय गतिविधि सूचारु हुने भन्दै संगठनले प्रतिवेदनमार्फत पर्यटनमा डिजिटल माध्यमलाई बढावा दिनुपर्ने सुझाव समेत दिएको छ ।

संगठनले आगामी केही साता पर्यटन क्षेत्रका लागि महत्वपूर्ण हुने भन्दै यो व्यवसायको भविश्य समेत खोपसँग जोडिएको बताएको छ । नेपालमा दुई छिमेकी मुलुक भारत र चीन यात्रा पूर्ण प्रतिवन्ध लगाउने मुलुकमा पर्छन् । दक्षिण एसियामा भूटान र पाकिस्तान समेत यसै सूचीमा छन् ।

तीन मुलुकमा पूर्ण खुला, नेपाल आंशिक

संयुक्त राष्ट्रसंघीय विश्व पर्यटन संगठनका अनुसार आइतबारसम्म कुल तीन वटा मुलुकले यात्रा प्रतिवन्ध पूर्ण रुपमा हटाएको पाइएको छ । यसरी प्रतिवन्ध हटाएर पर्यटकलाई स्वागत गर्ने मुलुकमा अल्वानिया, कोष्टारिका र डोमिनिकल रिपब्लिक रहेका छन् ।

यो विश्वको एक प्रतिशत अंश हो । नेपाल भने आंशिक खुला रहेको मुलुकमा रहेको छ । प्रतिवेदन अनुसार आफ्नो मुलुकको सीमानालाई आंशिक रुपमा खुला गर्ने मुलुकमा ७३ राष्ट्र छन् ।

यो कुल मुलुकको ३४ प्रतिशत अंश हो । दक्षिण एसियामा नेपाल र बंगलादेश यो सूचिमा छन् । यूरोप र अमेरिकी मुलुकहरु यो सूचिमा छन् ।

३६ प्रतिशत देशको सीमाना खुला, क्वारेन्टिन अनिवार्य

पूर्ण खुला, पूर्ण प्रतिवन्ध र आशिंक प्रतिवन्धबाट ३६ प्रतिशत मुलुकले भने शर्तसहित पर्यटकको स्वागत गर्न शुरु गरिसकेका छन् । ती मुलुकले सबै सीमाना खुला गरेका छन् ।

तर, विदेशी नागरिकलाई कोरोना परीक्षण र क्वारेन्टिनको प्रावधान अनिवार्य गरेका छन् । कुल ७८ मुलुकमा यस्तो प्रावधान शुरु भइसकेको छ । यो कुल मुलुकहरुको तुलनामा ३६ प्रतिशत संख्या हो । यो सूचीमा दक्षिण एसियाका अफगानिस्तान, श्रीलंका, माल्दिभ्स यो सूचिमा छन् ।

अर्थतन्त्रमा कस्तो असर ?

विश्व पर्यटन संगठनका अनुसार विश्वभरका २९ वटा मुलुकको कुल गार्हस्थ उत्पादनमा पर्यटन क्षेत्रले प्रत्यक्ष रुपमा २० प्रतिशत भन्दा माथिको योगदान गर्छ । यस्तो योगदान गर्ने मुलुकमा माल्दिभ्सदेखि मकाउसम्म छन् । जहाँ पर्यटन मूख्य आम्दानीको स्रोत हो ।

संसारका ४७ वटा देशमा पर्यटनले कुल गार्हस्थ उत्पादनमा १०-२० प्रतिशतसम्मको योगदान गर्छ । यो सूचीमा सिंगापुर, मलेसिया, श्रीलंका, न्यूजिल्याण्ड, यूएई, पोर्चुगल, हङकङसहितका मुलुक छन् ।

संसारभर ८० मुलुकमा पर्यटनले ५-१० प्रतिशतसम्म जिडिपीमा योगदान गर्छ । यो सूचीमा नेपाल, भारत, जापान, स्वीट्जरल्याण्ड, बेलायत, अमेरिकासहितका मुलुक छन् । जिडिपीमा ५ प्रतिशत भन्दा कम योगदान गर्ने मुलुक भने २५ वटा छन् । यो कुल मुलुकको ५ प्रतिशत हिस्सा हो ।

खोपको प्रभाव पर्यटन क्षेत्रमा

महामारीका बीच आफ्नो सीमाना पूर्ण वा आशिंक बन्द राख्ने मुलुकमध्ये ७० प्रतिशत एसिया र प्रशान्त क्षेत्रका छन् । यो यस्तो क्षेत्र हो, जहाँ कोरोना भाइरस विरुद्धको खोप वितरणको काम निकै सुस्त गतिमा वा कम भएको छ ।

संगठनले यो विषयलाई प्राथमिकताका साथ उठाउँदै यात्रा प्रतिवन्धमा रहेको भिन्नतालाई समेटेको छ । यूरोपमा अब १३ प्रतिशत मुलुकमा मात्र प्रतिवन्ध छ ।

अफ्रिकामा १९ र अमेरिकामा २० प्रतिशत मुलुकले मात्र सीमा नाका बन्द गरेका छन् । मध्यपूर्वी क्षेत्रका ३१ प्रतिशत राष्ट्रको सीमा नाका पर्यटक आगमनमा खुला हुन सकेको छैन ।

यस्तो छ विश्व पर्यटनमा प्रतिवन्धको पछिल्लो अवस्था

  • सीमानाका पूर्ण बन्द : ६३ मुलुक (२९ प्रतिशत)
  • सीमानाका आंशिक बन्द : ७३ मुलुक (३४ प्रतिशत)
  • सर्ततोकेर सबै सीमा खुला : ७८ (३६ प्रतिशत)
  • पूर्णखुला : ३ मुलुक (१ प्रतिशत)
Facebook Comment

छुटाउनुभयो कि?