हेटौंडामा तयार भयो २५ फिट अग्लो बुद्धमूर्ति

पर्यटन बजार२७ असार २०७८, आईतवार मा प्रकाशित

हेटौंडामा तयार भयो २५ फिट अग्लो बुद्धमूर्ति

 असार २७,काठमाडौँ। हेटौंडा उपमहानगरपालिका वडा नम्बर–१८ को गुम्बाडाँडास्थित पर्यटकीय पार्कमा ढुंगाबाट निर्मित २५ फिट अग्लो बुद्धको मूर्ति करिब तयार भएको छ । कोरोना सन्त्रासका कारण मूर्ति उद्घाटन भने हुन सकेको छैन । ललितपुरको बालकुमारीमा मूर्तिकार अमर शाक्यले ढुंगाको मूर्ति कुँदेको तर कोरोना प्रभावका कारण अनावरण गर्न नसकिएको बुद्धमूर्ति निर्माण संयोजन समिति संयोजक कमलचन्द्र सुमनले बताए ।

काठमाडौंका समाजसेवीहरु सुर्यब्रज लामा, सम्पूर्ण कुमार लामा, दुर्गामान शाक्य, शान्तरत्न शाक्य, किरणरत्न शाक्य, राजेश्वरी श्रेष्ठ, डा. बषन्तमान श्रेष्ठ, ज्योतिरत्न ब्रजचार्य सुभाषराज शाक्यले मूर्ति निर्माणका लागि करिब २ करोड बढी जुटाएका थिए । बागमती प्रदेश सरकारले मूर्ति प्रतिस्थापन गर्ने स्थान निर्माण र मूर्ति रहने स्थानसम्म पुग्ने सिँढी निर्माणका लागि ३५ लाख रुपियाँ उपलब्ध गराएको थियो । १८ नम्बर वडाले भने ५ लाख रुपियाँ उपलब्ध गराएको थियो ।

हर्नामाडीस्थित ‘कलागाउँ’ का रुपमा परिचित गुम्बाडाँडालाई बौद्धमय बनाउन शाक्यमुनि गौतम बुद्धको २५ फिट अग्लो ढुंगाबाट निर्माण गरी स्थापना गरिएको हो । मूर्ति स्थापना समिति संयोजक हेटौंडाका समाजसेवी सुमनले मूर्ति निर्माणका लागि कलाकार शाक्यसँग ४५ लाख रुपियाँमा सम्झौता भएको बताए । उनले मूर्ति स्थापनापछि उक्त क्षेत्रको मुहार फेरिने बताएका छन् ।

मूर्ति निर्माण समितिले काठमाडौंको बौद्धमा गरेको एक कार्यक्रममा एकैदिन १६ लाख ४० हजार रुपियाँ सहयोग संकलन भएको थियो । मूर्तिका लागि आवश्यक ढुंगा कुलेखानी, बनेपा र दक्षिणकाली जंगल क्षेत्रबाट लगिएको मूर्तिकारले जनाएका छन् ।

गत वर्षकै बुद्ध पूर्णिमाका दिन शिलान्यास गरिएको मूर्ति निर्माण तथा स्थापना र उक्त स्थानमा पार्कलगायत संरचना निर्माणका लागि करिब ३ करोड खर्च अनुमान गरिएको सुमनले जानकारी दिए । उनका अनुसार मूर्ति स्थापनासँगै उक्त क्षेत्रमा विभिन्न स्तुपा, ९० किलोको घण्टी, भवनहरु, पानीट्यांकी, मनोरञ्जन पार्क, कम्पाउण्डवाल र अन्य संरचना बन्ने क्रममा छन् । नेपालमा पहिलो पटक ९० किलोको घण्टी यहाँ राख्न लागेको बताए । ठुलो घण्टी विश्वमा ६० स्थानमा छ हेटौंडामा भने ६१ औं स्थान हुनेछ उनले भने ।

गुम्बाडाँडा हेटौंडा बजारबाट करिब १७ किमी पूर्व दक्षिणमा पर्दछ, जहाँ पछिल्लो समय बिदाका दिन आन्तरिक र वाह्य पर्यटकको भीड लाग्ने गरेको छ । सल्लाघारी भनिने ठाउँमा गुम्बा स्थापनापछि ‘गुम्बाडाँडा’ नामाकरण भएको हो । गुम्बा स्थापनापछि सामाजिकरुपमा चहलपहल हुँदै गर्दा सुरुवाती हिसाबमा मंगलसिं लामाको नेतृत्वमा २०६१÷०६२ ताका उक्त क्षेत्र स्थापना गरिएको हो ।

२०६९ सालमा त्यहाँ आयोजना गरिएको अन्तर्राष्ट्रिय मूर्तिकला कार्यशालामा कुँदिएका मूर्तिहरु त्यहाँ छन् । नेपाल र अन्य पाँच वटा देशका २३ मूर्तिकारले कुँदेका २३ प्रकारका मूर्ति गुम्बाडाँडामा सजाइएको छ । अन्तर्राष्ट्रिय मूर्तिकला कार्यशालासँगै गुम्बाडाँडाको हालको रुपसम्म ल्याउने श्रेय कलाकार लक्ष्मण भुजेल र डा. तारालाल श्रेष्ठ, प्राज्ञ ओम खत्रीलाई जान्छ ।

धरान–चतरा मार्गनजिक उक्त क्षेत्रमा पर्यटनको सम्भावनाका स्रोत धेरै छन् । हेटौंडामा मानिसको चाप बढ्दो छ । केवल १७ किलोमिटर परको क्षेत्र भएकाले दुरीका हिसाबबाट पनि एकान्त गुम्बाडाँडा पुगिसकेपछि त्यहाँको दृष्य आफैंमा मनमोहक छन् । करिब एक बिगाहा क्षेत्रमा बुद्धमूर्ति र अन्य संरचना रहेका छन् भने ४.२५ हेक्टर क्षेत्रमा कला प्रतिष्ठान रहेको छ ।

Facebook Comment

छुटाउनुभयो कि?