पुष ६,दोलखा। दोलखा स्थितको रोल्वालिङ हिमशृङखला क्षेत्रमा ४१६ विदेशी नागरिकले भ्रमण गरेका छन् । बिभिन्न ३९ देशका ४१६  विदेशी नागरिकले गौरीशङकर संरक्षण क्षेत्रको पर्यटकीय गन्तव्यहरुको भ्रमण गरेका गौरीशङकर संरक्षण क्षेत्रले जनाएको छ ।

संरक्षण क्षेत्रको तथ्याङक अनुसार सबैभन्दा धेरै ७१ जना फ्रान्सका नागरिकले भ्रमण गरेका छन् । अमेरिकाबाट ४८, जर्मनबाट ४२, बेलायतबाट ३१, स्पेनबाट २८, अष्ट्रेलिया २२ स्वीट्जरल्यान्डबाट १७, क्यानडाबाट १४, जापनबाट नौ जनालगायत रहेका छन् ।                                                                                                यहाँ पाँच हजारभन्दा माथिका थुप्रै हिमालहरु रहे पनि सात हजार १३४ मिटर उचाइको नेपालको समय मापनको विन्दु मानिएको र धार्मिक परम्परानुसार गौरीशङकर हिमालको आरोहणको अनुमति रहेको छैन ।

धार्मिक तथा प्राकृतिक रुपमा सम्पन्न दोलखा आफैमा पर्यटकीय गन्तव्य हो । दोलखामा पर्यटक ल्याउने गुरु योजनाहरु भने अझै अलमल देखिएको सरोकारवालाहरु बताउँछन् । गौरीशङकर हिमाललाई समेटेका यस संरक्षण क्षेत्रभित्र माथिल्लो तामाकोशी, भोटेकोशी, खिम्ती, सुनकोशी आदि नदीहरू पर्दछन् । विश्व प्रख्यात च्छोरोल्पा हिमताल, दूध पोखरी, पाँच पोखरी, जटा पोखरी, भैरव कुण्ड र बहुला पोखरीजस्ता प्रख्यात क्षेत्र पनि यसैभित्र पर्दछन् ।